උතුවන්කන්දේ බස් රථ අනතුරකින් 18ක් රෝහලට
කොළඹ – මහනුවර ප්‍රධාන මාර්ගයේ උතුවන්කන්ද වලකඩයාව ප්‍රදේශයේ සිදුවූ බස් රථ අනතුරකින් පුද්ගලයන් 18 දෙනෙකු තුවාල ලබා තිබේ.
අද උදෑසන 8:15 පමණ මෙම අනතුර සිදුව ඇති අතර ලංකා ගමනා ගමන මණ්ඩලයට අයත් බස්රථ දෙකක් මෙලෙස එකිනෙක ගැටී ඇති බවයි, පොලිසිය පැවසුවේ.
කෑගල්ලේ සිට මාවනැල්ල බලා ධාවනය කෙරෙමින් තිබූ බස් රථයක පිටුපස පානදුර සිට මහනුවර බලා ධාවනය කෙරෙමින් තිබූ බස් රථය ගැටී මෙම අනතුර සිදුව තිබේ.
පානදුර සිට ධාවනය කළ බස් රථයේ කාර්මික දෝෂයක් හේතුවෙන් රියදුරුට රථය පාලනය කරගැනීමට නොහැකිවීමෙන් මෙම අනතුර සිදුව ඇති බවට පොලීසිය සැක කරයි.
අනතුරින් තුවාල ලැබූවන් මාවනැල්ල හා කෑගල්ල රෝහල්වලට ඇතුළත් කළ බව කෑගල්ල පොලීසිය පැවසීය.
කෙසේවෙතත්, ඔවුන්ගේ තත්ත්වය බරපතල නොවන බවයි, පොලිසිය සදහන් කරන්නේ.