හිටපු අමාත්‍ය කුමාර වෙල්ගම මහතාගේ අවසන් කටයුතු අද
මෙරට ප්‍රමුඛ පෙළේ දේශපාලනඥයෙකු වූ හිටපු අමාත්‍ය කුමාර වෙල්ගම මහතාගේ දේහය පිළිබද අවසන් කටයුතු අද (30) පස්වරුවේ සිදු කිරීමට නියමිතයි.
ඒ මතුගම ආදාහනාගාරයේදීයි.
කොළඹ පෞද්ගලික රෝහලක ප්‍රතිකාර ලබමින් සිටියදී ඒ මහතා අභාවප්‍රාප්ත වන විට 74 වන වියේ පසුවුණා.
1950 වසරේ අප්‍රේල් 05 වනදා උපත ලැබූ ඒ මහතා ගල්කිස්ස ශාන්ත තෝමස් විද්‍යාලයේ ආදි ශිෂ්‍යයෙක්.
වෙල්ගම මහතා 1982 වසරේ ශ්‍රී ලංකා නිදහස් පක්ෂයෙන් අගලවත්ත ආසන සංවිධායකවරයා ලෙස දේශපාලන ගමන්මග ආරම්භ කළා.
1994 වර්ෂයේ පාර්ලිමේන්තුවට පිවිසි ඒ මහතා වසර 30ක් අඛණ්ඩව පාර්ලිමේන්තුව නියෝජනය කළා.
අමාත්‍ය ධුර කිහිපයක් දැරූ ඒ මහතා 2020 වසරේ දී නව ලංකා නිදහස් පක්ෂය පිහිටුවමින් එයට නායකත්වය ලබාදුන්නා.
කළුගංතොට සිංහයා නමින් කළුතර ජනතාව අතර ආදරයට පාත්‍ර වූ වෙල්ගම මහතා මෙරට ජන හදවත් දිනාගත් කෘතහස්ත දේශපාලනඥයෙක්.
ඒ මහතාගේ දේහයට අවසන් ගෞරව දැක්වීම සදහා හිටපු ජනාධිපති මහින්ද රාජපක්ෂ මහතා ඇතුලු දේශපාලන නියෝජිතයන් එක්ව සිටියා.