පාර්ලිමේන්තුවේ උණුසුම් තත්ත්වයක්
පාර්ලිමේන්තු සභා ගර්භයේ අද පෙරවරුවේ උණුසුම් තත්ත්වයක් ඇතිවී තිබේ.
ඒ, දෙමළ ජාතික සන්ධානයේ මන්ත්‍රීවරු පිරිසක් සභා ගර්භය මැදට පැමිණ උද්ඝෝෂණයක නිරත වීම හේතුවෙනි.
පසුගිය 8 වැනිදා වවුනියාවේ හින්දු කෝවිලකදී පුද්ගලයින් 8දෙනෙකු පුරා විද්‍යා නිලධාරීන් විසින් අත්අඩංගුවට ගන්නා ලදැයි කියන සිද්ධියක් පදනම් කරගනිමින් එම මන්ත්‍රීවරුන් මෙලෙස විරෝධතාවයේ නිරත වී තිබේ.
පසුව, අධිකරණ අමාත්‍ය විජයදාස රාජපක්ෂ මහතා විසින් අදාළ සිදුවීම සම්බන්ධයෙන් අපක්ෂපාතී පරීක්ෂණයක් සිදුකරන බව දැනුම්දීමෙන් අනතුරුව විරෝධතාවය නතර කිරීමට දෙමළ ජාතික සන්ධානයේ මන්ත්‍රීවරු කටයුතු කළේය.
මෙහිදී අදහස් දැක්වූ විපක්ෂ නායක සජිත් ප්‍රේමදාස මහතා පැවසූවේ පුද්ගලයෙකුට ආගමික ස්ථානයක වන්දනාමාන කිරීමට අවස්ථාව නැතිනම් එය පුද්ගලයෙකුගේ මානව අයිතිකම් උල්ලංඝනය කිරීමක් බවයි.
ආණ්ඩු පක්ෂයේ ප්‍රධාන සංවිධායක අමාත්‍ය ප්‍රසන්න රණතුංග මහතා
විපක්ෂ නායකතුමා දාන්නේ මේ ෂෝ එකක්
නියෝජ්‍ය කතානායක අජිත් රාජපක්ෂ මහතා
ඔය ගොඩක් දෙනා දාන්නේ ෂෝ තමයි.
අගමැති දිනේෂ් ගුණවර්ධන මහතා
මේ ප්‍රශ්නය නගන්න අපි විරුද්ධ නැහැ. තමන්ගේ ආසන වලට ගිහිල්ලා ප්‍රශ්නය නගන්න.
වන්නි දිස්ත්‍රික් මන්ත්‍රී චාල්ස් නිර්මලනාදන්
අට දෙනෙක් ඇරස් කරලා තියෙනවා ඒ අට දෙනාම නිදහස් කරන්න ඕන. උසාවියට දාලා තියෙන්නේ බොරු නඩුවක්.
අධිකරණ අමාත්‍ය ආචාර්ය විජයදාස රාජපක්ෂ මහතා
ඒ සිද්ධිය ගැන අධිකරණය සාධාරණය යුක්තිය ඉෂ්ට කරාවි. අධිකරණය තියෙන නඩුවක සැකකරුවන් නිදහස් කරන්න කියලා මේ පාර්ලිමේන්තුවේ කිව්වම හරි යනවද. ඒ ගැන දැන් තීන්දුව දෙන්න ඕන විනිසුරුවරු. සිද්ධිය ගැන අපක්ෂපාති පරීක්ෂණයක් තියලා සියලු තොරතුරු අධිකරණයට ඉදිරිපත් කරනවා.
විපක්ෂ නායක සජිත් ප්‍රේමදාස මහතා
මේ මුළු පාර්ලිමේන්තුවම ආගමික නිදහස ආරක්ෂා කරන්න බැඳී සිටිනවා.