උසස් පෙළ සංශෝධිත කාල සටහන නිකුත් කරයි

අයහපත් කාලගුණික තත්වයන් හමුවේ නොවැම්බර් 27, 28, 29, 30 සහ දෙසැම්බර් 02 හා 03 දිනයන්හි විභාගය නොපැවැත්වීම නිසා එම දිනයන්ට නියමිතව තිබූ ප්‍රශ්න පත්‍ර සඳහා පිළිවෙළින් දෙසැම්බර් 21, 23, 27, 28, 30 සහ 31 දිනවල අ.පො.ස.උසස් පෙළ විභාගය පැවැත්වීමට අදාළව සංශෝධනය කරන ලද විභාග කාල සටහන විභාග දෙපාර්තමේන්තුව විසින් ප්‍රකාශයට පත්කර තිබේ.

ඒ අනුව, නොවැම්බර් 27 වැනි බදාදාට නියමිත විෂයන් දෙසැම්බර් 21 වැනි සෙනසුරාදාත්, නොවැම්බර් 28 වැනි බ්‍රහස්පතින්දාට නියමිත විෂයන් දෙසැම්බර් 23 වැනි සඳුදාත්, නොවැම්බර් 29 වැනිදාට නියමිත විෂයන් දෙසැම්බර් 27 වැනි සිකුරාදාත්, නොවැම්බර් 30 වැනි සෙනසුරාදා පැවැත්වීමට නියමිත විෂයන් දෙසැම්බර් 28 වැනි සෙනසුරාදාත්, දෙසැම්බර් 02 වැනි සඳුදා පැවැත්වීමට නියමිත විෂයන් දෙසැම්බර් 30 වැනි සඳුදාත්, දෙසැම්බර් 03 වැනි අඟහරුවාදා පැවැත්වීමට නියමිත විෂයන් දෙසැම්බර් 31 වැනි අඟහරුවාදාත් පැවැත්වේ.

එමෙන්ම දෙසැම්බර් 04 දා සිට 20 දක්වා පෙර කාල සටහනේ සඳහන් විෂයන් එම දිනවල නියමිත ලෙස පැවැත්වෙන බවද විභාග දෙපාර්තමේන්තුව සඳහන් කරයි.

ලා දුඹුරු පැහැයෙන් නිකුත් කර ඇති මෙම සංශෝධිත කාල සටහනේ පිටපතක් උසස් පෙළ සියලුම අපේක්ෂකයන් සඳහා සාමාන්‍ය පොදු පරීක්ෂණ ප්‍රශ්න පත්‍රය පැවැත්වෙන දෙසැම්බර් 07 වනදා විභාග මධ්‍යස්ථානවලදී ලබා දෙන බවද ඒ ඒ අපේක්ෂකයන් සඳහා තමන්ට නියමිත විෂයන් සඳහාවූ කාල සටහන විහාග දෙපාර්තමේන්තුවේ නිල වෙබ් අඩවියෙන් විභාග අංකය හෝ ජාතික හැඳුනුම්පත් අංකය භාවිතා කර බාගත කර ගැනීමට පහසුකම් සලසන බවද විභාග කොමසාරිස් ජනරාල් එච්.ජේ.එම්.සී. අමිත් ජයසුන්දර මහතා මහතා පැවසීය.